1.12 – 1.19 (śaṅkhāḥ)

Level 1

Level 2

Level 3

Level 4

bhīṣmo duryodhanaṃ paśyati. bhīṣmo duryodhanaṃ harṣayitum icchati.

bhīṣmaḥ kathaṃ harṣayati duryodhanam? bhīṣmo nadati.

bhīṣmasya śaṅkhaḥ. bhīṣmaḥ śaṅkhaṃ dhamati. bhīṣmo naditvā śaṅkhaṃ dhamati.

sarve yodhāḥ śṛṇvanti nādaṃ bhīṣmasya. sarve yodhāḥ śṛṇvanti nādaṃ bhīṣmasya śaṅkhasya.

bahūnāṃ yodhānāṃ śaṅkhāḥ. bahavo yodhāḥ śaṅkhān dhamanti.

ke yodhāḥ śaṅkhān dhamanti?

kṛṣṇo 'rjunaś ca śaṅkhau dhamataḥ. bhīmo yudhiṣṭhiraś ca śaṅkhau dhamataḥ. nakulaḥ sahadevaś ca śaṅkhau dhamataḥ.

sarve putrāḥ pāṇḍoḥ śaṅkhān dhamanti.

kāśīrājaḥ śikhaṇḍī dhṛṣṭadyumnaś ca śaṅkhān dhamanti. virāṭaḥ sātyakiś ca śaṅkhān dhamataḥ. drupadaḥ śaṅkhaṃ dhamati.

bahavaḥ putrā draupadyāḥ śaṅkhān dhamanti. abhimanyuś ca śaṅkhaṃ dhamati.

sarve putrā dhṛtarāṣṭrasya śṛṇvanti nādam. sarve putrā dhṛtarāṣṭrasya nādaṃ sarveṣāṃ śaṅkhānāṃ śṛṇvanti. sarve putrā dhṛtarāṣṭrasya bhītā bhavanti.

bhīṣmo duryodhanasya harṣaṃ saṃjanayitum iyeṣa. sa naditvā śaṅkhaṃ dadhmau.

tato bahavaḥ śaṅkhā bheryaś cābhyahanyanta. sa śabdo mahān abhavat.

sarve yodhāḥ, śrutvā bhīṣmasya nādam, śaṅkhān dadhmuḥ.

kṛṣṇo 'rjunaś ca, mahati rathe sthitau, śaṅkhau dadhmatuḥ. bhīmo yudhiṣṭhiraś ca śaṅkhau dadhmatuḥ. nakulaḥ sahadevaś ca śaṅkhau dadhmatuḥ.

sarve pāṇḍuputrāḥ śaṅkhān dadhmuḥ.

kāśīrājaḥ śikhaṇḍī dhṛṣṭadyumnaś ca śaṅkhān dadhmuḥ. virāṭaḥ sātyakiś ca śaṅkhān dadhmuḥ. drupadaś ca śaṅkhaṃ dadhmau.

sarve drupadaputrāḥ śaṅkhān dadhmuḥ. abhimanyuś ca śaṅkhaṃ dadhmau.

sarve dhṛtarāṣṭraputrā bhītā abhavan. sa mahāñ śabdo dhṛtarāṣṭraputrāṇāṃ hṛdayāni vyadārayat.

pratāpavān kuruvṛddhaḥ pitāmahaḥ (bhīṣmaḥ) kim iyeṣa? bhīṣmo duryodhanasya harṣaṃ saṃjanayitum iyeṣa. sa siṃhanādam uccair vinadya śaṅkhaṃ dadhmau.

tataḥ śaṅkhā bheryaḥ paṇavānakagomukhāś ca sahasaivābhyahanyanta. sa śabdas teṣāṃ tumulo 'bhavat.

tato mādhavaḥ pāṇḍavaś ca (kṛṣṇo 'rjunaś ca) divyau śaṅkhau pradadhmatuḥ. etau mahati syandane (rathe) sthitau. etat syandanaṃ śvetair hayair yuktam. mādhavaḥ pāṇḍavaś ca śvetair hayair yukte mahati syandane sthitau divyau śaṅkhau pradadhmatuḥ.

hṛṣīkeśaḥ (kṛṣṇaḥ) pāñcajanyaṃ nāma śaṅkhaṃ dadhmau. dhanaṃjayaḥ (arjunaḥ) devadattaṃ nāma śaṅkhaṃ dadhmau. vṛkodaro bhīmakarmā (bhīmaḥ) pauṇḍraṃ nāma mahāśaṅkhaṃ dadhmau.

rājā kuntīputro yudhiṣṭhiro 'nantavijayaṃ nāma śaṅkhaṃ dadhmau. nakulaḥ sahadevaś ca sughoṣamaṇipuṣpakau nāma śaṅkhau dadhmatuḥ.

he pṛthivīpate (dhṛtarāṣṭra)! parameṣvāsaḥ kāśyaḥ, mahārathaḥ śikhaṇḍī, dhṛṣṭadyumno virāṭaś ca, aparājitaḥ sātyakiś ca, drupado draupadeyāś ca mahābāhuḥ saubhadraḥ (abhimanyuḥ subhadrāputraḥ) ca, sarvaśaḥ pṛthak pṛthak śaṅkhān dadhmuḥ.

sa tumulo ghoṣo nabhaś ca pṛthivīṃ caiva vyanvanādayat. sa dhārtarāṣṭrāṇāṃ hṛdayāni vyadārayat.

tasya saṃjanayan harṣaṃ kuruvṛddhaḥ pitāmahaḥ । siṃhanādaṃ vinadyoccaiḥ śaṅkhaṃ dadhmau pratāpavān ॥ 12 ॥

tataḥ śaṅkhāś ca bheryaś ca paṇavānakagomukhāḥ । sahasaivābhyahanyanta sa śabdas tumulo 'bhavat ॥ 13 ॥

tataḥ śvetair hayair yukte mahati syandane sthitau । mādhavaḥ pāṇḍavaś caiva divyau śaṅkhau pradadhmatuḥ ॥ 14 ॥

pāñcajanyaṃ hṛṣīkeśo devadattaṃ dhanaṃjayaḥ । pauṇḍraṃ dadhmau mahāśaṅkhaṃ bhīmakarmā vṛkodaraḥ ॥ 15 ॥

anantavijayaṃ rājā kuntīputro yudhiṣṭhiraḥ । nakulaḥ sahadevaś ca sughoṣamaṇipuṣpakau ॥ 16 ॥

kāśyaś ca parameṣvāsaḥ śikhaṇḍī ca mahārathaḥ । dhṛṣṭadyumno virāṭaś ca sātyakiś cāparājitaḥ ॥ 17 ॥

drupado draupadeyāś ca sarvaśaḥ pṛthivīpate । saubhadraś ca mahābāhuḥ śaṅkhān dadhmuḥ pṛthak pṛthak ॥ 18 ॥

sa ghoṣo dhārtarāṣṭrāṇāṃ hṛdayāni vyadārayat । nabhaś ca pṛthivīṃ caiva tumulo vyanunādayan ॥ 19 ॥